Rom 7 | KMG | STEP | Âgo bureŋ, sâcmutâc dâŋ mamana ŋoŋere mukopac ŋoŋe kecšiŋuc mi manaŋgopieŋ me? Sâcmutâc dâŋ rereŋke i hâmocko taraekac.

Romans 7

Mârore hata ɋario juzo

1 Âgo bureŋ, sâcmutâc dâŋ mamana ŋoŋere mukopac ŋoŋe kecšiŋuc mi manaŋgopieŋ me? Sâcmutâc dâŋ rereŋke i hâmocko taraekac. 2 Irec hâcne ŋokac moc e ŋowene ɋâricne juhame bebehene mi fokac. sâcmutâc dâŋko iŋuc mukicne. Ŋowe-ticne hâmome ine sâcmutâc dâŋko ŋowe ŋonâŋ jahere mukicne i tarakac. 3 Ŋokac moc e ŋowe-ticne ɋâricne juhame beherâ ŋic moctao qohotame šuhuc bâtâcte kiŋ hurekac muzo. Ŋowe-ticne hâmome ine sâcmutâczi niŋgiŋ-jofawec niŋgiŋ i tâcneocmu: ehame ŋic moc baocmuo šuhuc bâtâcte kiŋ mi hureocmu. 4 Âgo bureŋ, ŋoŋere fuŋne ijaha fokac. Kristo e sahac-ticne hâmocte qikiŋnewec, erao šuhuckehuc sâcmutâc dâŋ hâmocnembiŋ. Ʒi ine ru mocte embiŋ. Hâmockonec faharewec jukac ere hâcne embiŋ. Irec nâŋâc Anutu fârine bâfuacnenšepeneŋ¡ 5 Juju raŋɋa jujumbeneŋ dameŋ ira sâqocnere sasec i sâcmutâc dâŋzi šocticne ficneme me sahac-nâŋecko gie-ticne bajujec. Iŋuc enâreme hâmo sipiricte fârine bâfuambeŋ. 6 Ʒi ine sâcmutâc dâŋ hâmocnepene niŋgiŋ-ticne tarawecko dâŋqâreŋte hata raŋɋane mi âtehuc Mârore hata ɋâricne âteŋgopeneŋ.

Sâqocnezi hobeteŋko ŋesiŋnehuc suruc-nâpoekac

7 Eme ši weniŋuc muzo? Sâcmutâc dâŋ i sâqocne me? I aricne i¡ Mâc sâcmutâc dâŋ tâmiric muzac, no sâqocnere fuŋne mi mana tarazapo. Sâcmutâc dâŋzi šiŋuc mufua-nâreekac: “Go andac mi ezemec.” Dâŋ i mi fome muzac andacte kâuc bazapo. 8 Sâqocne e ine sâcmutâc dâŋzi ŋesiŋ ecnehame maŋnane suruckeme andac fuŋne fuŋne fuawec. Sâcmutâc dâŋqâhâc mi fome muzac sâqocnezi mâc mâteŋkerâ fozac. 9 No mârâc jaha sâcmutâc dâŋqâhâc tâmiricko sâcne juhâmopo. Izi šâhec sâcmutâc dâŋzi bâfuacnume sâqocnezi maŋnaneo ɋâreme hâmopo. 10 Sâcmutâc dâŋzi enareme juhâmopemurâ mukicne izi hâcne ŋerisierâ šikanehec ewec. 11 Ine hâcne sâqocnezi hobeteŋko ŋesiŋnehuc sâcmutâc dâŋte erâ eatucnuhuc qâhâmocnuwec. 12 Erâ ine šiŋuc: Sâcmutâc dâŋqâhâc e bahacmâc, â bâfâuckehuc moc moc mutâcnekicne i wâc bahacmâc â tiŋne â biaŋne. 13 Hâc, eme dâŋ biaŋnezi hâmoc bâfua-narewec? Iŋuc mâcne, sâqocnezi nuwec. Sâqocne fuŋne-ticne taniŋke-jâmbâŋkeocte dâŋ biaŋnezi âki heha hâmocne nuwec. Sâqocnere manapene gâgâpâcne jâmbâŋ eocte sâcmutâc dâŋzi âki heha nuwec.

Me sahac-nâŋecko sâqocnezi gie hae ewec

14 Nâŋâc šiŋuc manaŋgopeneŋ: Sâcmutâc dâŋ e Mârore tofa, no ine mâreŋte tofa, sâqocnere hozine. 15 No eebapa-nanere manape ririsi eekac. No wiac moc ezo enare-bipieme mi eekopac, â wiac sureekopac ine eekopac. 16 Erâ wiac sureekopac i ehuc ine sâcmutâc dâŋzi biaŋne irec fuŋne bataniŋkeekopac. 17 Eme hehesic eekopac i no nahacne maŋte mâcne, sâqocnezi maŋnaneo fohuc surucnume eekopac. 18 No fuŋne šiŋuc manakopac: Maŋnaneo, sahac biuc-nanere maŋko hâcne, biaŋnezi fic hae mi ewec jukac, wiac biaŋnere mumu I muekopac, â fârine bâbâfua ine arictac. 19 No wiac biaŋne ezepac muhuc mi eekopac, â wiac sâqocne mi ezepac muhuc ine eekopac. 20 Sâqocne mi ezo muhuc sifu eekopac ine šiŋucte, i no nahac mâcne, sâqocnezi maŋnaneo fic hae ewecte jâiŋko eekopac. 21 Norao sâcmutâc kecšiŋuc fuaekac: Wiac biaŋne ezo muhape sâqocnezi maicnuekac. 22 No maŋwâmbuŋ-nanezi Anutu sâcmutâc dâŋticnere mana aŋac eekopac. 23 Ehame me sahac-naneo sâcmutâc moc fokac izi maŋ mamanasu-nanere dâŋhec rârâsi eekopirec, ehuc niŋgiŋnume sâqocnere sâcmutâc dâŋ me sahac-naneo fic hae ewec ere kâpâcwâru ŋic eekopac 24 Ŋic huacbucne no mozi sahac-nane hâmocte biŋe ekicne hetara-nareocmu? 25 Anutu e Wofuŋ-nâŋec Jesu Kristore erâ muteŋkekopac. Eme šiŋuc hâcne: No nahac maŋ mamanasu-nanezi Anuture sâcmutâc dâŋ kiŋaŋ qacneekopac, sahac-nanezi ine sâqocnere sâcmutâc dâŋ kiŋaŋ qacneekopac.